Kwina nguuki!

From Wikipedia
Jump to: navigation, search

Ngai akirathima Agikuyu na bururi utagaga mai na bothi. Miaka meingi mehitoku tukoretwo tukigana utonga na maundu mega mega maria mari bururi-ini wa gikuyu. Utongoria wihotaneire, biacara ciorugamitie ona andu mendete thayu na waragania.

Matuko turi, tiga ari kuhinga maitho andu marahinga, kwina undu wi theinie wa bururi wa Agikuyu, gutire mundu uracokia bara nginyo atarerie uria we mwene thamiri ciake iramwira, kana macire na arunawe uria maundu maikarite.

Riri wa bururi wa Agikuyu ni kuhotoma urahotoma o kahora, mbura ikanyiha kana ikaura riria itetereirwo ona guthira irio iria cei mugunda itari iragimara. Teri wa migunda itu niu hinjite uu ati ona terere uria wekuragia o guo ni kwenda kwa Ngai ndungikura riu, ithima cia mai iria ciari cianda-ini riu irorete guthira, njui irathie na mbere ikehukaga, miti nayo iria yarehaga riera itheru na huho, na ngu riu nitwaninire na gutire mundu urenda gwithumbura kugitira kana kuhanda miti ingi meingi.

Ng'ongo nginya ng'ongo kurekika maundu ma magigi, kunyitwo kia hinya gwi ciana cia airitu, kuragana, kungea andu matari kiene mitwe ta mburi, umaraya, uici, uhenania, kwa iteo gatagati ka rika. Maya ni maundu mararakaria Ngai witu.

Mundu o wothe ndarenda gutema itemi kurunga ciana riria ona igika oru, aciari aingi marerorera ciana ciao ta thinema cia ruraya riria igwika maundu mataringaine na meciria kana wendi wao.

1. Nuu wagiriirwo gutema itemi ria kurunga mitugo ya ciana citu?

2. Gitiyo kiguragwo ku? kana kiumaga thendi cigana?

3. Wa huria haria na nie hurie haha, ciakuhuria ciathira-ii tukahuria ki?

4. Ni atia wega? Kuhikia atumia aingi kana kugia na airitu maraya?

5. Ciana cia riko-ni ni ciao? Mundurume auna mburi yene kuguru, niarere! tondu yaciara mahatha yongithagia tweri. Nikugie na watho wandikwo mabuku-ini ati, wauna mburi yene kuguru, urere mwana ucio, tutige kugia na ciana itari na maithe kana cokura.

Andu kana ruriri rungiurira Ngai na wendi wake, runyitagwo ni kinguuki na kirumi. Witiiye na ugikuyu, rumia rithiomi rwaku, theremia na uturie mitugo miega ya ruriri rwaku, tiga gukobia mitugo ya nduriri utoi. Kai o matangikobia ruriri rwaku! Kai o matetiyagira ruriri rwao. Wenda gwitua ngombo niki? Wetua mundu uteyui. Wetua mundu wa kwimena. Ugagitherema ri?

Kimani wa Ng'ang'a http://gikuyu.blogspot.com